အမေရိကားမှာနေတဲ့ ရဟန်းအမတစ်ယောက်က ဦးဇင်းတဲ့ တပည့်တော် ဒီလ 24-ရက်နေ့ ကျရင် မွေးနေ့ပွဲလုပ်မယ်ဘုရားဆိုပြီး လျှောက်ပါတယ်။ ဒါနဲ့ မေးလိုက်ပါတယ် ဘယ်ပုံ ဘယ်နည်း မွေးနေ့ပွဲလုပ်မလဲ ဆိုတာကိုပေါ့။ အဲဒိတော့ လျှောက်ပါတယ် ရဟန်းအမက တပည့်တော် မွေ့းနေမှာ အသက်ခြောက်ဆယ်အ ထက် အဘိုးအဖွားတွေကို ဖိတ်ထားတယ်ဘုရား။ တပည့်တော် ဖိတ်ထားတဲ့အထဲမှာ အသက် ကိုးဆယ်ကျော်တွေလည်း ပါတယ်ဘုရားတဲ့။ နောက်ပြီး ဘုန်းဘုန်းတွေကိုလည်း ပင့်ထားတယ်တဲ့။ အသက်ကြီး ပူဇော်ပွဲလေး သဘောမျိုးလုပ်မှာ ပါဘုရားဆိုပြီး လျှောက်ပါတယ်။ စိတ်ထဲကတော့ မှတ်ချက်ချလိုက်ပါတယ် တယ်ကောင်းတဲ့ စိတ်ကူးပါလား ဆိုပြီးတော့ပေါ့။ မသေချာသေးတာနဲ့ ပေါ်တင်ပဲ မေးလိုက်ပါတယ်။ အဲဒိစိတ်ကူးက သူတပါးဆီက ကူးချတာလား၊ ကိုယ်ပိုင်လားဆိုပြီးမေးတော့။ ကိုယ်ပိုင်ပါဘုရားတဲ့။ ဒါဆိုရင် တော့ သာဓု သုံးကြိမ်ခေါ် လိုက်ပါပြီဆိုပြီး သာဓုခေါ်ပေးလိုက်ပါတယ်။ တကယ်လည်း သာဓုခေါ်ထိုက်ပါ တယ်။ ကိုယ့်ရဲ့မွေးနေ့လေး မှာ ကိုယ့်မိဘဘိုးဘွားအရွယ်ရှိတဲ့ သက်ကြီးရွယ်အိုတွေကို ဖိတ်ကြားပြီးတော့ ပူဇော်ပွဲလုပ်တာရယ်၊ ရဟန်းသံဃာတော်တွေကို ပင့်ဖိတ်ပြီးတော့ လှူဒါန်းမှု အစုစုလုပ်တယ်ဆိုတာဟာ တကယ်ကို မွန်မြတ်ပါတယ်။ ဒါနဲ့ မွေးနေ့ပွဲအတွက် အမှတ်တရလေးဖြစ် သွားအောင် ဘာရေးရရင် ကောင်းမလဲဆိုပြီး စဉ်းစားကြည့် လိုက်တော့ အကြောင်းအရာကဘာမှကို ရှာလို့ကို မရပါဘူး။ စဉ်းစားလေ မရလေ၊ စဉ်းစားလေ မရလေနဲ့ပဲ အိပ်ပျော်သွားခဲ့ပါတယ်။ ဒီလိုနဲ့ ညပိုင်းအိပ်မက်ထဲ မှာ နွေရာသီယဉ်ကျေးမှုသင် တန်းလေးတစ်ခုအကြောင်းကို မက်ပါတယ်။ အဲဒိမှာ ကလေးလေးတွေကို မင်္ဂလာကဗျာလေး သင်ပေးနေတာပါ။ သင်ပေးရင်း သင်ပေးရင်းနဲ့ ဒါနဉ္စအပိုဒ်…..
“သုံးတန်စေတနာ ဖြုစင်လန်းလို့၊ ပေးကမ်းဝေမျှ လှူနိုင်စေ။
ကိုယ်နှုတ်စိတ်ကြံ မမိုက်မှားနဲ့၊ သုစရိုက်တရားကို ကျင့်ပါလေ။
ဆွေမျိုးတွေကို ပြင်ပမထားနဲ့၊ သင်္ဂဟတရားနှင့် ချီးမြှောက်လေ။
သန့်စင်ပြစ်မျိုး၊ လူထုကျိုး၊ သယ်ပိုး ဆောင်ရွက်စေ။ အဲဒါမှ ဗုဒ္ဓ၀ါဒ ကမ္ဘာ့မင်္ဂလာတွေ။” ဆိုတဲ့ကဗျာလေးလည်းရောက်ရော ကလေးတွေဆိုနေတာ အားမရတာနဲ့ သူတို့အားလုံးလည်း အော်ပြီးတော့ ဆိုအောင် ကိုယ်ကလည်းလိုက်ပြီး အော်ဆိုရင်းကနေ အိပ်ယာက နိုးသွားပါတယ်။ ဒါနဲ့ မနက်ခင်းစောစော စီးစီး မှာ မထင်မှတ်ဘဲ အကြံတစ်ခု ကောက်ရလိုက်ပါတယ်။ အဲဒါကတော့ ဒီမင်္ဂလာကဗျာလေးထဲမှာပါတဲ့ အကြောင်းလေးတွေရေးရရင် ကောင်းမှာပဲဆိုတဲ့ အကြံလေးပါ။ ဒီလိုနဲ့ပဲ ရေးဖြစ်သွားပါတယ်။
ဒီကဗျာလေးရဲ့ ပထမပါဒမှာသုံးထားတဲ့ “သုံးတန်စေတနာဖြူစင်လန်းလို့” ဆိုတာလေးကို ရှင်းရမယ် ဆိုရင် ဦးဇင်းတို့ ဗုဒ္ဓဘာသာဝင်တွေရဲ့ ဒါနအမှု၊ သီလအမှု၊ သမာဓိအမှု ဆိုတဲ့ လုပ်ငန်းဆောင် တာ တွေထဲက ပထမဦးဆုံး အမှုဖြစ်တဲ့ ဒါနအမှုကို လုပ်ကြတော့မယ်ဟေ့ဆိုရင် အရင်ဆုံး ကုသိုလ်ကိစ္စပြု လုပ်ရာ အထမမြောက်ခင် ဖြစ်တဲ့စေတနာကို ပုဗ္ဗစေတနာ လို့ခေါ်ပါတယ်။ အဲဒိနောက် ကုသိုလ်ကိစ္စ အထ မြောက်တဲ့အချိန်မှာဖြစ်တာကိုတော့ မုဉ္ဇစေတနာလို့ ခေါ်ပါတယ်။ နောက်ဆုံး ပေးလှူခြင်းကိစ္စပြီး ဆုံးသွားပြီးလို့ အဲဒိကုသိုလ်ကိစ္စတွေကို စိတ်ထဲမှာ အဖန်ဖန်အထပ်ထပ် အောက်မေ့ခြင်းတွေ ဖြစ်နေတာ ကိုတော့ အပရ စေတနာဆိုပြီး ခေါ်ပါတယ်။ အဲဒီလို စေတနာတွေ ဖြစ်ပေါ်ရာမှာလည်း ဖြူစင်လန်းလို့ ဆိုတာလေးကို ထောက်ပြီးတော့ စေတနာဖြစ်ပေါ်တိုင်းဖြစ်ပေါ်တိုင်း မိမိတို့ရဲ့ စိတ်ထားလေး ဟာ ဖြူစင်နေစေရပါမယ်။ လန်းဆန်းနေစေရပါမယ်။ ဆိုလိုချင်တာကတော့ ပီတိနှင့်အတူဖြစ်စေချင်တဲ့ သဘောလေးထင်ပါတယ်။ ဒီနေရာမှာ စေတနာပျက်ခြင်း၊ ဖြစ်ခြင်းသဘောတွေနဲ့ပါတ်သက်ပြီး ဥပမာသာဓ ကတွေရေးပြရမယ်ဆိုရင် အများကြီးဖြစ်သွားမည်စိုးသောကြောင့် ချန်လှပ်ခဲ့ပါတယ်။
“ပေးကမ်းဝေမျှလှူနိုင်စေ” ဆိုတာလေးကတော့ ဒါနဆိုတဲ့ပုဒ်ရဲ့ အဓိပ္ပာယ်သဘောတရားလေး တွေ ပါ။ ဒီနေရာမှာ ဒါနဆိုတဲ့ ပုဒ်ကလေးကို အဓိပ္ပာယ်ပြန်လိုက်မယ်ဆိုရင် စွန့်ကြဲ၊ ပေးကမ်း၊ လှူဒါန်းဆိုပြီး သုံးမျိုးဖြစ်လာပါတယ်။ ဘယ်လိုကွဲသွားသလဲဆိုတော့ ကိုယ့်ထက် အမျိုးဇာတ်အားဖြင့်၎င်း၊ ဂုဏ်အားဖြင်၎င်း၊ အရွယ်အားဖြင့်၎င်းနိမ့်ကျတဲ့သူတွေကိုဒါနမှုပြုတာကြတော့ စွန့်ကြဲခြင်းဆိုတဲ့ သဘောနဲ့သုံးပါတယ်။ ကိုယ်နဲ့ အမျိုးဇာတ်၊ ဂုဏ်၊ အရွယ်အားဖြင့် တန်းတူညီတူဖြစ်တဲ့ ပုဂ္ဂိုလ်တွေကို ဒါနပြုတာကိုတော့ ပေးကမ်းတယ်ဆို ပြီး သုံးပါတယ်။ နောက်ဆုံး ကိုယ့်ထက် ဇာတ်၊ ဂုဏ်၊ အရွယ်အားဖြင့် သာလွန်တဲ့ပုဂ္ဂိုလ်တွေကို ဒါနပြုတာ ကိုတော့ လှူဒါန်းတယ်ဆိုပြီးသုံးပါတယ်။ အလှူပေးတဲ့နေရာမှာလည်း “အလှူခံ တကျိတ်လေး၊ ခွေးကအစ” ဆိုတဲ့ မြန်မာစကားပုံလိုပဲ အလှူခံပုဂ္ဂိုလ်အမျိုးအစားဟာ (၁၄) မျိုးရှိပါတယ်။ ဒါကိုလည်း ချန်လှပ်ခဲ့ပါတယ်။
“ကိုယ်နှုတ်စိတ်ကြံ မမိုက်မှားနဲ့” ဆိုတာလေးကတော့ ဗုဒ္ဓဘာသာဝင်တွေ သိပြီးသားဖြစ်တဲ့ ကာယကံ (ကိုယ်ဖြင့်ပြုသောအမှု)၊ ၀စီကံ (နှုတ်ဖြင့်ပြုသောအမှု)၊ မနောကံ (စိတ်ဖြင့်ပြုသောအမှု)ဆိုတဲ့ ကံတွေကို မပြုမိပါစေနဲ့ဆိုပြီးပြောထားပါတယ်။ ဘယ်လိုကာယကံမျိုးလည်းဆိုတော့ သူ့အသက်ကိုသတ်ခြင်း၊ သူ့ဥစ္စာကို ခိုးယူခြင်း၊ သူ့အိမ်ရာကို ပြစ်မှားခြင်းဆိုတဲ့ ကိုယ်ခန္ဓာနဲ့စပ်လျဉ်းပြီး ပြုလုပ်ရတဲ့ ကံတွေပါ။ ၀စီကံ ဆိုတာကလဲ မဟုတ်မမှန်ပြောဆိုခြင်း၊ ချောပစ်ကုန်းတိုက်ခြင်း၊ ကြမ်းတမ်းသောစကားကို ပြောဆိုခြင်း၊ အကျိုးမရှိသော စကားကို ပြောဆိုခြင်းဆိုတဲ့ ကံတွေပါ။ မနောကံကတော့ သူတပါးစည်းစိမ်ကို ရှေ့ရှုကြံခြင်း၊ သူတပါးပျက်စီး အောင် ကြံစည်တောင့်တခြင်း၊ မှားသောအယူကို ယူခြင်းဆိုတဲ့ ကံတွေပါ။ ဒီကံတွေကို မပြုမိ ပါစေလင့်ဆိုပြီး တားမြစ်ရခြင်းအကြောင်းကတော့ ဒီမကောင်းမှု ဒုစရိုက်တရား (၁၀)ပါးကို ပြုမယ်ဆိုရင် ပြုတဲ့ပုဂ္ဂိုလ်ဟာ သေသည်၏အခြားမဲ့၌ အပါယ်ငရဲသို့သာ လားရာ ရှိသောကြောင့်ဖြစ်တယ်ဆိုတာကို ဒုစ္စရိတသုတ်မှာ ဟောတော်မူထားပါတယ်။
“သုစရိုက်တရားကို ကျင့်ပါလေ” ဆိုတာကတော့ အထက်အပိုဒ်မှာ ပြောခဲ့တဲ့ ဒုစရိုက်တရား (၁၀)ပါးကို ရှောင်ကြဉ်ပြီး သုစရိုက်တရားတွေကို ဖြည့်ကျင့်ပါဆိုပြီး တိုက်တွန်းထားတာပါ။ အဲဒိသုစရိုက် တရားတွေကို ဖြည့်ကျင့်တာကိုတော့ စာရိတ္တသီလလို့ခေါ်ပါတယ်။ စာရိတ္တသီလကို ဖြည့်ကျင့်လိုတဲ့ ပုဂ္ဂိုလ် အနေနဲ့ကတော့ သဒ္ဓါတရားရှိဖို့နဲ့ ၀ီရိယတရားနှစ်ပါးရှိဖို့ လိုအပ်ပါတယ်။ တဖန် ၀ါရိတ္တသီလ ကို ဖြည့်ကျင့်ချင်တဲ့ပုဂ္ဂိုလ်တွေ အတွက်ကတော့ အဓိကအားဖြင့် ၀ီရိယတရားလေး ရှိဖို့ပဲလို ပါတယ်။ ဒါကတော့ စာရိတ္တသီလနှင့်ဝါရိတ္တသီလ တို့ရဲ့ ထူးခြားတဲ့ လက္ခဏာလေးတွေပါ။ ဒီနေရာမှာ သီလ၏ ကောင်းကျိုး ဆိုးကျိုးများ သီလစောင့်ထိန်းခြင်း၏ ကောင်းကျိုးရပုံများ၊ သီလမရှိခြင်း၏ ဆိုးကျိုးရပုံ တို့မှာ များစွာရှိပါတယ်။ ကောင်းကျိုးဆိုးကျိုးများသည် စောင့်ထိန်းသောသီလ၊ လွန်ကျုးသောသီလတို့ အပေါ်၌ မူတည်ပြီး အကျိုးတရားများ ရရှိခံစားကြရပါတယ်။ ဒါ့ကြောင့် သီလတစ်ခုချင်း၏ ကောင်းကျိုး ဆိုးကျိုးများကို ရေးသားတင်ပြရရင် များသွားမည်စိုးသောကြောင့် ဒီမှာလည်းပဲ ချန်လှပ်ခဲ့ရပါဦးမယ်။
“ဆွေမျိုးတွေကို ပြင်ပ မထားနဲ့” ဆိုတဲ့နေရာမှာ ဆွေမျိုးဆိုတာ မိမျိုး၊ ဖမျိုး နှစ်ဘက်လုံးမှ အမျိုးတွေ လည်း ဖြစ်နိုင်သလို မိမိနဲ့သိကျွမ်းခင်မင်သူ တမြေတည်းနေပြီးပေါက်ဖွားလာတဲ့သူ၊ ပင့်ဖိတ်ထား တဲ့သူတွေ လည်း ပါဝင်ပါတယ်။ အဲဒိလူတွေကို လည်း ပြစ်မထားပါနဲ့တဲ့။ အဲဒါကိုတော့ “အတ္တနော ဉာတ ကာနံ ပေတာနံ အတ္ထာယ ဒါနံ ဒတွာ ဥဒ္ဒိသန္တိ ‘‘ဣဒံ အမှာကံ ဉာတီနံ ဟောတူ” ဆိုတဲ့စကားလေးမှာ တကယ်လို့များ ကိုယ့်ရဲ့ ဘ၀ါဘ၀က တော်စပ်ခဲ့တဲ့ဆွေမျိုးအပေါင်းအဖော်တွေဟာ မကျွတ်မလွတ်သေးတဲ့ ပြိတ္တာဘ၀တွေ ရောက်နေပြီဆိုရင် သူတို့ကို ရည်စူးပြီးတော့ ကောင်းမှုကုသိုလ်လုပ်ကာ အမျှအတမ်းပေးဝေ ဖို့ မမေ့ပါနဲ့ဆိုတာ ကို ပြောထားတာကြည့်ခြင်းအားဖြင့် သိသာနိုင်ပါတယ်။
“သင်္ဂဟတရားနှင့်ချီးမြှောက်လေ” ဆိုတဲ့နေရာမှာ သင်္ဂဟသည် ပါဠိစကားဖြစ်ပါတယ်။ ဒီနေရာမှာတော့ ချီးမြှောက်ခြင်းဆိုပြီး အနက်အဓိပ္ပါယ်ရတယ်။ ချီးမြှောက်ခြင်းဆိုရာမှာလည်း တပါးသူတို့အား ချီးမြှောက်ခြင်းကို ဆိုလိုပါတယ်။ ဒီသင်္ဂဟတရား ထွန်းကားပါမှ လောကကြီးလည်း သာယာ ငြိမ်းချမ်းမှာပါ။ အခြေအနေနဲ့ အချိန်အခါအားလျော်စွာ သင်္ဂဟတရားတို့ကို ကျင့်သုံးသော ပုဂ္ဂိုလ်တို့ဟာ ကြီးပွားချမ်းသာကြပါတယ်။ တဦးနှင့်တဦး ဆက်ဆံကြရာတွင်လည်း သင်္ဂဟတရားများသည် အလွန်အရေး ကြီးတဲ့ တရားများဖြစ်ပါတယ်။
ဗုဒ္ဓဘုရားရှင်၏ ဟောကြားတော်မူချက် အရ သင်္ဂဟတရားလေးပါးရှိပါတယ်။ အဲဒါတွေကတော့-
၁။ ပေးကမ်းထောက်ပံ့ခြင်းဖြင့် ချီးမြှောက်ခြင်း (ဒါန)
၂။ ချစ်ဖွယ်စကား ပြောဆိုခြင်းဖြင့် ချီးမြှောက်ခြင်း (ပီယ၀ါစာ)
၃။ သူ့အကျိုးပြီးမြောက်အောင် ဆောင်ရွက်ပေးခြင်းဖြင့် ချီးမြှောက်ခြင်း (အတ္ထစရိယာ)
၎။ ကိုယ်နှင့်ထပ်တူ ပြုမူဆက်ဆံခြင်းအားဖြင့် ချီးမြှောက်ခြင်း (သမာနတ္ထတာ) တို့ဖြစ်ပါတယ်။
ဒီနေရာမှာ ပေးကမ်းထောက်ပံ့ခြင်းဖြင့် ချီးမြှောက်ခြင်း ဆိုသည်မှာ-ပစ္စည်းလက်ဆောင်ပေး၍ ချီးမြှောက်ခြင်းကို ဆိုလိုပါတယ်။ ချစ်ဖွယ်စကား ပြောဆိုခြင်းဖြင့် ချီးမြှောက်ခြင်း ဆိုသည်မှာ-လူအများနှင့် ဆက်ဆံပြောဆိုရာတွင် နားဝင်ချိုသာသည့် အခေါ်အဝေါ်မျိုး၊ အပြောမျိုးဖြင့် ဆက်ဆံခြင်းဖြစ်ပါတယ်။ အဖေ အမေ အကိုအမ အဒေါ် ဦးကြီးဦးလေး ညီမလေး ညီလေး မောင်လေး စသည်ဖြင့်ခေါ်၍ ခင်မင်စွာ ပြောဆို ဆက်ဆံခြင်းဖြစ်ပါတယ်။ သူ့အကျိုးပြီးမြောက်အောင် ဆောင်ရွက်ပေးခြင်းဖြင့် ချီးမြှောက်ခြင်း ဆိုသည်မှာ-တပါးသူတို့၌ သာမှု နာမှု ပြစ်မှု စတဲ့ ကိစ္စရပ်များ ကြုံလာလျှင် လက်ဆောင်ပေးပို့ရုံဖြင့် မပြီးသေး၊ ချစ်ဖွယ်စ ကား ပြောနေ၍လည်း မပြီးသေး၊ ထိုကိစ္စများ ပြီးစီးအောင် ကူညီဆောင်ရွက်ပေးခြင်းဖြင့် ချီးမြှောက် ရ ခြင်း ဖြစ်ပါတယ်။ ကိုယ်နှင့်ထပ်တူ ပြုမူဆက်ဆံခြင်းအားဖြင့် ချီးမြှောက်ခြင်း ဆိုသည်မှာ-အမျိုး ဥစ္စာ ရာထူး ဂုဏ်သိန်အားဖြင့် မိမိနှင့်မညီမျှသော်လည်း တန်းတူထား၍ ပေါင်းသင်း ဆက်ဆံရခြင်း ဖြစ်ပါတယ်။
အခုလို သင်္ဂဟတရားကို လက်ကိုင်ထားနိုင်မှသာလျှင် လူသားဘ၀မှာလည်း သာယာစိုပြေလာမည့် အပြင်၊ လူတဦးနှင့်တဦးကြားမှာလည်း ဆက်ဆံရေးတွေ ပိုမိုကောင်းမွန်လာပြီး လူထုကို စည်းရုံးရာ၌ပင် လွန်စွာအသုံးဝင်သောရှေးအကျဆုံး၊ အရိုးဆုံး၊ အလွယ်ဆုံးနည်းပင်ဖြစ်မည်မှာ ဧကန်မလွဲပေ။ ဒီသင်္ဂဟ တရားလေးပါးကို မကျင့်သုံးပါက မိမိဖခင်ကိုပင် သားသမီးများက ကျေးဇူးတုန့်ပြန်ကြမည် မဟုတ်ချေ။ အဖေ ဟူ၍ပင် ခေါ်ကြမည်မဟုတ်ပေ။
အချုပ်အားဖြင့်ဆိုရသော် မိမိတို့ပြုလုပ်သော ဒါနအမှုကိစ္စ၊ သီလအမှုကိစ္စ၊ ဘာဝနာအမှုကိစ္စတိုင်း ကိစ္စတိုင်းမှာ အထက်တွင်ဆိုပြီးခဲ့သည့်အတိုင်း မင်္ဂလာတရားတော်နှင့်အညီ ပြုလုပ်နိုင်မည်၊ စိတ်ထားနိုင် မည်ဆိုပါက မည်သူမဆို ကောင်းခြင်းမင်္ဂလာတွေနှင့်ထုံမွှမ်းပြီး သူတော်ကောင်းတွေရဲ့ ချီးမွမ်းထောမနာ အပြုခံရမည်မှာ မလွဲပါပေဆိုသည့်အကြောင်းကို တင်ပြရင်း ယနေ့ကျရောက်သော ဒကာမကြီး၏ မွေးနေမှ သည် နောင်နှစ်ပေါင်းများစွာတိုင်အောင် မွေးနေ့တိုင်းမွေးနေ့တိုင်း၊ မွေးရက်တိုင်းမွေးရက်တိုင်း၌ “ဒါနဉ္စ ဓမ္မစရိယာစ” ဆိုတဲ့အတိုင်း စေတနာသုံးတန်ပြဋ္ဌာန်းပြီး အလှူအတန်းတွေလည်း ပေးလှူနိုင်းပြီးသကာလ၊ “ဉာတကာနဉ္စ သင်္ဂဟော” ဆိုတဲ့အတိုင်း ဆွေမျိုးမိတ်ဆွေ သင်္ဂဟတွေကိုလည်း သင်္ဂဟတရားလေးပါး နှင့် အညီထောက်ပံ့နိုင်ပြီးသကာလ ကောင်းခြင်းမင်္ဂလာ တွေနှင့်ထုံမွှမ်း သော မွေးနေ့များပိုင်ရှင် ဖြစ်ပါစေကြောင်း ဆန္ဒပြုရင်း……….
ကိုယ်နှုတ်စိတ်ကြံ မမိုက်မှားနဲ့၊ သုစရိုက်တရားကို ကျင့်ပါလေ။
ဆွေမျိုးတွေကို ပြင်ပမထားနဲ့၊ သင်္ဂဟတရားနှင့် ချီးမြှောက်လေ။
သန့်စင်ပြစ်မျိုး၊ လူထုကျိုး၊ သယ်ပိုး ဆောင်ရွက်စေ။ အဲဒါမှ ဗုဒ္ဓ၀ါဒ ကမ္ဘာ့မင်္ဂလာတွေ။"
0 comments:
Post a Comment